Partiya seçkilərlə bağlı qərarını avqustda açıqlayacaq

Açıq Cəmiyyət Partiyası (ACP) bu il Azərbaycanda keçiriləcək parlament seçkiləri ilə bağlı qərarını Ali Məclisin avqust ayına təyin olunmuş iclasında qəbul edəcək. Partiya sədrinin müavini Nizami Məmmədov APA-ya bildirib ki, iclasda partiyanın namizədlər siyahısı təsdiq olunacaq. O, ACP dövlət qeydiyyatına alınmadığı üçün üzvlərin seçkiyə bitərəf namizəd kimi qatılacağını qeyd edib: “Ümumiyyətlə, Azərbaycanda majoritar seçki sistemi mövcuddur və seçkilərdə fərdlər iştirak edir. Ona görə də əslində seçkilərdə partiya şəklində iştirak mexanizmi yoxdur. Hazırda partiyada seçkiyə hazırlıq işləri aparılır və avqustun sonunda namizədlərimiz açıqlanacaq”. N. Məmmədov seçkiyə qatılacaq namizədlərin sayının hələlik bəlli olmadığını deyib. ACP lideri Rəsul Quliyevin seçkilərdə namizədliyini irəli sürüb-sürməyəcəyinə gəldikdə, N. Məmmədov bunun eks-spikerin özündən asılı olduğunu deyib: “Hələlik Rəsul Quliyevin belə bir qərarı yoxdur”.