Nazirlik kəndlilərin məsuliyyət daşıdığını bəyan etdi

Ekologiya və Təbii Sərvətlər Nazirliyi (ETSN) iyulun 27-də Şabran rayonunun Xəlifələr, Düzbilici, Qorğan, Sumağa, Qazma və Pirəbədil kəndlərində baş vermiş yanğınlarla bağlı məlumat yayıb.
Nazirliyin mətbuat xidmətindən APA-ya verilən məlumata görə, kənlərin ərazisindəki torpaq mülkiyyətçiləri tərəfindən “Yanğın təhlükəsizliyi haqqında qanunun” tələbləri pozularaq taxılı biçilmiş sahələrdə kövşənlər yandırılıb. Küləkli hava şəraiti yanğını şiddətləndirərək onun yayılma ərazisini genişləndirilib və hətta adları çəkilən kəndlərin yanma təhlükəsi yaranıb.
Yanğın ETSN-nin yerli qurumlarının, Şabran rayon İcra Hakimiyyəti, Fövqəladə Hallar Nazirliyinin Şabran rayon dövlət yanğından mühafizə hissəsinin əməkdaşlarının, habelə yerli əhalinin səyləri nəticəsində saat 21:00 radələrində söndürülüb, yanğının meşə fonduna keçməsinin qarşısı alınıb. Bundan başqa, iyulun 27-də Siyəzən rayonunun Calğan və Qozağacı kəndləri ərazisində də kövşənlərin yandırılması nəticəsində yanğın hadisəsi baş verib və genişlənərək 1000 hektardan artıq bələdiyyə torpaqlarının ərazisini əhatə edib. Yanğın həm də Şabran Meşə Mühafizəsi və Bərpası Müəssisəsinin 1,5 hektar meşə fonduna keçib. ETSN-nin yerli qurumlarının, ərazidə işləyən “Azərkörpü” Açıq Səhmdar Cəmiyyətinin 23 saylı tikinti sahəsinin işçilərinin səyləri nəticəsində yanğın söndürülüb, meşə fondunda təbii otlar yansa da, ağaclara ziyan dəyməyib.